Wikipedia in lengoa ligure a çerca di colaboratoî

17 apr 2018 by Franco.Bampi, 4 Commenti »

In sce l’urtimo numero do Boletin da Compagna ò scrito ‘n apello pe çercâ di colaboratoî pe Wikipedia in lengoa ligure che me pâ giusto reprodue anche chi in sciô blog pe dâ mòddo a chi se sæ de intervegnî a dî a seu.

**********

Dedico o fondo de sto trimestre a l’apello scrito into titolo pe spiêgâ perché l’é inportante trovâ personn-e che gh’aggian coæ de scrive de voxe enciclopediche in zeneize.

Quande se parla de lengoa ligure se deve intende l’insemme de parlæ storicamente adêuviæ in sciô teritöio regionale e inti pòsti dove son stæte mantegnue da-e comunitæ che an conservòu anche atre tradiçioin, comme a Carlofòrte e a Câdezédda. Inte ’n contesto ouropêo a lengoa ligure a l’é ’na Lengoa Regionale ò minoritaia a-i sensi da “Carta Ouropea de Lengoe Regionali ò minoritaie”, che a l’Art. 1 a stabilisce che con l’esprescion “lengoe regionali ò minoritaie s’intende e lengoe (…) che no son dialetti da lengoa ofiçiale do stato”. A “Carta Ouropea de Lengoe Regionali ò minoritaie” a l’é stæta aprovâ o 25 de zugno do 1992 e a l’é intrâ in vigore o primmo de marso do 1998. L’Italia a l’à firmòu quella Carta o 27 de zugno do 2000 ma a no l’à ancon ratificâ. In cangio a l’à fæto ’n’òrìbile lezze, a lezze n. 482 do 15 de dexenbre do 1999, ch’a no riconosce nisciunn-a de parlæ nasciue da-o teritöio, comme o zeneize, o napolitan, o sicilian, o veneto, o lonbardo, ecc. ecc. A despeto de l’Italia, a nòrma ouropea ISO 639-3 a mette o ligure tra e lengoe, e no tra i dialetti. Comme a lengoa italiann-a gh’à o còdice it, quella françeize fr, quella spagnòlla es, quella tedesca de, e via discorindo, anche a lengoa ligure a gh’a ’n còdice ch’o l’é lij.

Ò vosciuo mette in ciæo ste cöse chi, pe parlâ de Wikipedia, l’enciclopedia online ch’a ven scrita in tante lengoe (tutte e lengoe?). No sò s’ei mai notòu che l’indirisso da Wikipedia italiann-a o l’é it.wikipedia.org, de quella tedesca o l’é de.wikipedia.org, ecc., saiva a dî che e letie che vegnan primma de wikipedia.org son o còdice ISO 639-3 da lengoa. Aloa cöse sucede se çerchemmo lij.wikipedia.org? Da no creddighe! Se va in scê pagine de Wikipedia scrite in zeneize! Sci, l’é pròpio coscì: existe a Wikipedia scrita in zeneize! Vegne donque naturale fase doe domande.

A primma a l’é: ma a cös’a serve ’n’enciclopedia scrita in zeneize? Che senso gh’à leze a vitta de Einstein ò o teorema de Pitagora in zeneize? Intanto in italian i libbri che parlan de ’n mæximo argomento son çentanæa, in zeneize ti te devi acontentâ de quello che passa o convento: in solo articolo in sce lij.wikipedia.org. Insomma, l’é ciæo che l’òferta colturale in zeneize a l’é ben ben de meno de quella in italian, pe no parlâ di testi in ingleize che li se ghe nega. A Wikipedia ligure a no dev’ese ’na fotocòpia da Wikipedia italiann-a: a dev’ese a poscibilitæ de mette in mostra e voxe ciù inportanti pe niatri e pe-a nòstra coltua: cantanti zeneixi, monumenti e sciti stòrichi e colturali da Liguria, a stöia da Liguria e de colònie liguri into mondo e tante atre cöse a niatri câe. Pròpio pe questo lij.wikipedia.org a l’é a ciù grande sfidda a-o zeneize: l’é vea ò no che in zeneize se peu parlâ de tutto comme in italian? Ben, se semmo in graddo de fâ ’n’enciclopedia tutta in zeneize a rispòsta a l’é sci, in caxo contraio vorieiva dî che o zeneize o l’é mutilòu, che gh’é di argomenti che in zeneize no se peuan tratâ e donque, a-a fin di conti, o zeneize o no saieiva ’na lengoa perché ’na lengoa a l’é ’na parlâ dove ti peu dî ògni cösa.

A segonda domanda a l’é: chi l’é che aministra lij.wikipedia.org? Se se va a çercali chi se screuve che i aministratoî son trei: un o l’é o Giromin Cangiaxo e i atri doî son o Feipìn, saiva a dî o nòstro vice prescidente Filippo Noceti, e o Luensu1959, ch’o l’é o Lorenzo Lentini, nòstro sòccio da 25 anni (dito a-a cheita gh’é in tòcco do Lentini pròpio inte questo numero do Boletin). Insomma doî di trei aministratoî fan parte da Compagna! Liatri ghe mettan tutta a pascion pe dase da fâ a dimostrâ che o zeneize o l’é ’na lengoa co-o conpilâ e voxe da ciù avoxâ enciclopedia online.

Aloa domando a tutti viatri che lezei sto Boletin, e a tutti i vòstri amixi che parlan zeneize, de rendive disponibili a colaborâ con lij.wikipedia.org co-o contatâ o sòccio Lorenzo Lentini, dito Loenso, in sce lij.wikipedia.org ò a st’indirisso chi: lorlentini@hotmail.com

E, comme senpre, alegri!

Franco Bampi

4 Commenti

  1. pep bru scrive:

    Bravo!
    anche se devo dire che a me interessano anche gli articoli che non parlano sulla Liguria. Voglio dire che veramente si può parlare di tutto in ligure, non soltanto di temi locali. Basta soltanto che chi scrive su un tema se ne intenda veramente -e se non c´è nessuno che se ne intenda su un tema allora è meglio che per il momento non ci sia l´articolo

    a proposito: scicome inta wp ligure gh´e di tocchi in ventemigliusu e atri dialetti, fòscia se dovieiva piggiâ l´àndio di parlâ meno di “zeneize” e ciù di “ligure”?

    Alégri

  2. Loénso scrive:

    A Wikipedia Lìgure a l’é averta a tùtti quelli chi vêuan contriboî e a tùtte e parlæ lìguri. Mi son riuscîo a contatâ l’Asociaçión monegasca a setemann-a pasâ, òua speremmo ch’i ne dàggan ‘na màn. Invece ancón ninte da-i brigaschi e da quelli de l’izôa de San Pé (ma quarche artìcolo in quelle parlæ gh’é za). Ad ògni mòddo, se peu scrîve de tùtto e sorviatùtto in sce quelle cöse chi ne gùsta de ciù, perché bezéugna pigiâ pasción in tùtto quello che femmo.
    A propòxito: gh’é di artisti inportanti pe-a Ligùria chi no g’àn ancón a seu pàgina in sciâ nòstra Wiki: prezénpio I Trilli, Beppe Gambetta, Gino Paoli, Piero Parodi e Paolo Bonfanti. E alôa mi diggo che chi, pe fâghe önô, anche sôlo dôe righe e ‘na fòto saieivan mêgio che ninte!
    Alêgri! Luensu1959

  3. Clòudio scrive:

    Mi son ‘n zoenòtto cresciuo in te l’ entrotaera Ligure, e me piaxieiva scrive quarcösa a propòxito de mae valladde, in particolare de Cichê, da Valle Sturla è da Fontann-a Bonn-a. O problemma l’è però che me manche a conpetensa pê scrive de tae materie…

    • Loénso scrive:

      Câo Clòudio,
      a l’é ‘na belìscima idêa perchè inta nòstra Wiki no gh’é propio ninte in scê valàdde che t’æ mensonòu. Ti peu començâ pigiando comme modéllo a pàgina in italiàn da Valle Sturla. Pe-o resto ne stâte a preocupâ, te daggo ‘na màn mi. Sentimmose pe email.
      E stémmo de longo alêgri!

Lascia un commento

Wikipedia in lengoa ligure a çerca di colaboratoî

In sce l’urtimo numero do Boletin da Compagna ò scrito ‘n apello pe çercâ di colaboratoî pe Wikipedia in lengoa

Ràtto penûgo. Ma perché se dixe coscì?

Ràtto penûgo. Ma perché se dixe coscì?

In zeneize ‘pipistrello’ o se tradue ràtto penûgo ò ràtto pernûgo; chi sotta quello che scrive o Cazassa: Ma da

L’inportansa da grafia ofiçiâ

L’amigo Zòrzo Òdon o l’é stæto protagonista de ’n interesante esperimento de letua e conversaçion dov’o l’à provòu a mostrâ

Lescico e scintasci

Devo famene ’na raxon e pigiâ nòtta che tanti pensan che quande se parla do zeneize tutto va ben. In

CATEGORIE

Link utili

Search

Archivio