Venerdì 18 zenâ: in nòstro grande monumento: o canposanto de Stagen
M’é parsciuo davei bello o gîo ch’emmo fæto a Stagen pe vedde i capolavori fæti fâ da-a borghexîa de l’Eutoçento pe celebrase.
Emmo dito che o canposanto de Stagen o l’é stæto progetòu da-o Carlo Barabin ch’o l’é mòrto de colera do 1835, tròppo fito pe vedde a seu òpera realizâ. O l’à pigiòu e brille inte man o seu alievo Gioan Batista Resasco ch’o l’à cangiòu o progetto pensando a ’n canposanto ciù grande e ch’o l’é quello ch’o raprezenta ancheu a parte ciù antiga de Stagen.
O primmo mòrto o l’é stæto misso do 1851, dæta ch’a segna l’iniçio do canposanto. Da notâ che aloa Stagen o l’ea comun outònomo ch’o saiâ rionio a Zena solo do 1874: insomma Zena a l’aiva fæto o seu canposanto inte ’n atro comun!
L’é stæto dito ch’o l’é grande 33 ètari, saiva a dî 46 canpi da balon. Gh’é asoteròu ciù de doî milioin de personn-e in oltre 150.000 tonbe.
Into Pantheon, dove gh’é asoteròu i zeneixi ciù ilustri, mi ò fæto notâ che gh’é anche l’Antonio Caveri che praticamente nisciun sa chi o l’é, sciben ch’o l’à ricoverto tutte e poscibili càreghe publiche e che gh’é stæto intitolòu ’na stradda a San Pê d’Ænn-a. Se voei saveine de ciù andæ a leze questa pagina.
’Na coreçion a ’na cösa ch’ò dito: o Nicolò Barabin o no l’ea in poeta, ma in famoxiscimo pitô, asoteròu into canposanto da Castagna de San Pê d’Ænn-a, comun dov’o l’é nasciuo.
Pe quello che rigoarda e paròlle ripòrto chi l’epigrafe ch’a l’é in sciâ tonba do Giovanni Battista Rapallo, poeta e tra i sòcci fondatoî da Compagna,
O testo o l’é fæto da-e doe tersinn-e do sonetto che o Baciccia o l’à scrito pe aderî a-a Compagna. A sto sonetto chi risponde Edoardo Firpo, definio “in zoveno ch’o gh’à talento”, co-in sonetto publicòu in sciô Sucesso e arestòu ascordòu finn-a a pöco tenpo fa. Se v’interessa a stöia do sonetto do Firpo poei leze ste doe pagine: pag. 1 e pag. 2.
De l’epigrafe da tonba do Baciccia gh’é da segnalâ e paròlle dìccia (= fortuna), viâxo (= verace), mentre pe-a radìccia lascio parlâ o Cazassa
Concluddo co-o domandâ a traduçion da paròlla ‘scivoloso’: in trasmiscion emmo dito scugiànte: viatri comme ghe diêsci?
Alegri!
Non mi sembra giusto: il participio presente vuol dire CHE SCIVOLA….mi diè CH’U FA SCÜGIÒ. …ma mi sun tabarchiña😊
Quello che dice Margherita è molto interessante..
Ma forse questo sarebbe uno di quei casi di doppio senso, come accade con parole come l´italiano (o catalano, e immagino anche genovese) “CURIOSO”: che significa qualcuno/a che prova curiosità -e quindi ne è il soggetto- ma anche qualcosa che la solleva -e quindi l´oggetto della curiosità.
Intendo dire che forse anche in questo caso qui scugiànte potrebbe significare “colui che scivola” ma anche “quello che fa scivolare”..