Magara quarchedun de viatri, lezuo o titolo, o pensiâ che me son inaròu a scrive anpólle ritegnindo che in zeneize se dixe, quæxi pægio a l’italian, bólle. Ma no l’é coscì! Perché se l’é vea che o Cazassa o registra a paròlla bólla

o o fa solo per rimandâ a-a paròlla ciù viaxa anpólla

Derê a sta paròlla gh’é anche in fæto coiozo. Do 1921 o poeta Carlo Malinverni (1855-1922) o sciòrte co-o seu segondo libbro de poexie intitolòu: Bolle de savon (o primmo o l’ea sciortio do 1908 co-o titolo: Doe bròcche de viovetta). In bello pö de anni dòppo, do 1953, l’Alfredo Gismondi (1874-1965) inte l’arecugeita de seu poexie, Arvî e giöxie, o ne dedica unn-a pròpio a-o Malinverni pe avei intitolòu mâ o seu libbro do 1921. Defæti o Gismondi o sostegne che ‘bolle di sapone’ o va traduto anpólle de savón, mentre e bólle son quelle de l’inciòstro. Coscì o scrive inte l’epigrafe:
Anpolle de savon, bolle d’inciòstro
Confessemose ògnun o pecòu nòstro
Ma pöi o s’acòrze che o Cazassa o registra, sciben in mòddo no tròppo ciæo, anche a paròlla bólla e coscì o scrive ’na segonda poexia dove o da qualche giustificaçion pe l’uzo fæto de quella paròlla da-o Malinverni.

Se pensemmo a cöse sucede a-a giornâ d’ancheu (co-o zeneize e con l’italian ascì), quella disputa a profumma de l’ingenoitæ de ’n tenpo pasòu dove ògnidun o l’ea òrgoliozo de seu reixe e da seu lengoa da difendila anche inte cöse ciù picinn-e.

Ma vegnimmo a-e paròlle che ò domandòu a-i ascoltatoî. Ti-ê chi:
capigliatura = cavelêa, caveléuia
fuliggine addensata alle pareti che cola per l’umidità = ciugiànn-a
acqua stagnante = ægoa coâ çitâ insemme a-o proverbio: l’ægoa coâ a derûa i pónti.
Oltre e paròlle ò anche prezentòu ’n indovinello in zeneize ch’o se peu atrovâ, testo e soluçion, clicando chi.

Verso a-a fin ’na scignoa a l’à tiòu feua a paròlla: nazaròlla. Gh’emmo studiòu in diretta anche con l’agiutto de chi o l’à telefonòu pe arivâ a scrovî quello che o Cazassa o l’aveiva za rigistròu do 1876:

Se semmo torna domandæ comme se tradue ‘in bocca al lupo’ e mi resto da mæ òpinion: o va traduto in bócca a-o lô, perché se ti o dixi inte ’n atro mòddo ti perdi quello che sta fraze chi a l’evoca.

Concluddo con l’aregordâ che l’é sciortio o mæ neuvo Dizionario Italiano – Genovese, ch’o saiâ prezentòu o 5 de dexenbre a çinqu’oe inte l’aola 1A da facoltæ d’Architetua. Mi in trasmiscion pe mostrâ cöse se peu atrovâ inte sto neuvo diçionaio – ch’o registra ben 27290 paròlle – ò dito che gh’é finn-a registròu a traduçion da paròlla italiann-a icnéumone. Chi sa cös’a veu dî e comme a se tradue?

Alegri!