Sabbo 24 de zugno co-i figeu de Vobietta, i bescheutti da Preti e tanti artisti

25 giu 2017 by Franco.Bampi, 5 Commenti »

Trasmiscion spostâ a-o sabbo pe via do balotaggio de domenega 25 de zugno ch’o decidiâ chi saiâ o pròscimo scindico de Zena. Tra i òspiti o Diego e o Filippo de Vobietta, scimpatichi comme senpre co-e seu batue che ponzeggian.

Dato che i telefoni ean seræ, e paròlle in scê quæ discutte no son goæi. Emmo dito che in zeneize ‘anitra’ a se dixe ània coscì comme ‘zia’ e ‘zio’ van traduti làlla e bàrba. Dæto che ancheu l’é San Gianbatista e a tradiçion a veu che inta neutte tra o 23 e o 24 de zugno s’açende i feughi, ò aregordòu che o veo nomme zeneize do ‘falò’ o l’é fòu, plurale foéi, e che i antighi ciamavan o nòstro santo protetô Sàn Zâne; defæti Zane a l’é a traduçion viaxa de Giovanni, ch’a se treuva inti repertöi stòrichi primma de Gioàn e de Bacìccia, ch’o veu dî Giovanni Battista.

Inta trasmiscion l’é sciortio feua o mòddo de dî italian: ‘pagare alla romana’; mi ò fæto notâ che in zeneize se dixe: pagâ a-a sestrìnn-a, comme conferma o Cazassa

Alegri!

5 Commenti

  1. Gianfranco scrive:

    Ciù ò meno, torno a ripete quello ch’o za scrito a vòtta pasâ: o FALÒ in zeneize, magara, o se ciamiâ fòu in cangio de l’inprobabile (ma tutto l’è poscibile) fôu, scrito dò-u Cazassa, o quæ son o saieiva, gròsso mòddo fuuü. Mi, però, sto muggio, de röba de legno, ch’o bruxa l’ò senpre sentio mensonâ solo in ocaxon da festa do santo do leugo: donca ligòu a-a religioxitæ e mai a de sagre, dimmo, profane. E coscì, into specifico, l’emmo senpre sentio ciamâ con in leogo comun, saiva a dî: sanzane, da San Zane, fòscia perché a tradiçion do FALÒ, into zeneize, a l’è comensâ da-a sò festa. Coscì, prezenpio, anche a San Scî de Struppa, o paize do vescovo, dito l’amolitta, a seia da vigilia da sò festa açendeivimo o sanzane. Ma òua me vegne in cheu che, da bardascia, a cösa ciù divertente ligâ ò-u FALÒ a l’ea quella d’andâ a dâ feugo a quello preparòu da-i atri quarch’oa primma che comensesse a lô festa. Eimo pròpio bastardi.

  2. Caterina scrive:

    Me piāxe dî che, a Monterosso,i fân ‘o fòu pe’ San Gianbattista e che l’ho visto fâ anche a Mattarana (Matāna) , comune de Cāro. Pe’ ‘o fòu de Monterosso,i me dīvan ‘i maê scolari che i l’andāvan a récoggî cascétte da-’a frūta,tocchi de bàrche lévaê de insémme,rémme stucchaê,caréghe e mobilia véccia ,i radunāvan tutto e,poi,quànde o l’éa ‘o moménto,i gh’é dāvan feûgo.
    A Bonassêua,in da maêxima occaxiòn,crédo,in s’ ‘o mùccio de légne,i ghé méttéivan un fantòccio che o rapprésentava ünna donna ch’a l’éxistéiva véraménte e che a l’usāva fummâ ‘o sigāro e ,fōsci, anche ‘a pìppa ,e ,quànde i gh’é dāvan feûgo,’i zovénétti i criāvan :” O brùxia ‘a Maddaléna!”. Quésto mî no l’ho mai vìsto : i m’ou contāvan ‘e maê làlle e o capitāva ‘ao prénçìpio do neûvéçénto. Alégri!

  3. Marco scrive:

    Bongiórno Profesô, per “sestrìnn-a” (occhio alla seconda S) si intende Ponente o Levante?

    • Franco.Bampi scrive:

      Graçie pe-a segonda s (che mi me l’aivo ascordâ). Pe-a question se Sestri o l’é quello de levante ò de ponente, into seu libbro “Modi di dire dei genovesi”, Nelio e Ivana Ferrando fan riferimento a Sestri Levante perché o gh’à doî mâ, quindi un de sa e un de la, ògnidun pe-i fæti seu.

  4. Zòrzo scrive:

    I mòddi de dî ” pagâ a-a sestrinn-a, e l’âtro ” quelli de Sestri àn dôe fàcce” fàn riferimento a Sestri Levante, giusto pe-i doî mâ.

Lascia un commento

L’inportansa da grafia ofiçiâ

L’amigo Zòrzo Òdon o l’é stæto protagonista de ’n interesante esperimento de letua e conversaçion dov’o l’à provòu a mostrâ

Lescico e scintasci

Devo famene ’na raxon e pigiâ nòtta che tanti pensan che quande se parla do zeneize tutto va ben. In

A lengoa leteraia

A lengoa leteraia

Se ne sente parlâ e de spesso no s’acapisce cöse s’intende quande se dixe: lengoa leteraia. Ma cöse diascoa a

È corretto cambiare la grafia dell’autore che si cita?

Inte questo comento o Marco Rosci, dòppo avei lezuo quello che gh’é scrito chi: “No moiò tutto arrëo” cit. da

CATEGORIE

Link utili

Search

Archivio