No scordemmose chi semmo

26 ott 2016 by Franco.Bampi, 5 Commenti »

In sce l’urtimo Boletin da Compagna l’é sciortio questo mæ tòcco che m’è cao riprodue chi in sciô blog.

Pe ciù de eutto secoli, Zena a l’é stæta capitale de ’n stato che, tanto pe intendise, ciamiö Republica de Zena. Za da-o 1099 co-o parteçipâ a-a primma Croxâ i Zeneixi an fæto conosce a-o mondo d’aloa de che pasta ean fæti. E a-a fin do Duxento Zena a l’ea a ciù grande potensa do Mediteranio, saiva a dî de tutto o mondo d’aloa. E con ciù de çinqueçento colònie a governava i trafeghi con l’òriente.
Pöi, co-a scoverta de l’America (1492), o Mediteranio, che Zena à dominòu pe di secoli, o vegne ’n lago: i trafeghi se spostan in sce l’Atlantico e o reizego d’anâ a bagno e de perde tutto o l’é grande. Ma i Zeneixi ean de longo de quella pasta e an saciuo cangiâ da mercanti (genuensis ergo mercator) a banchieri in graddo de prestâ sciummi de dinæ a-e ciù grende potense do mondo. Eh za, a quelli tenpi l’öo o nasceiva in America, o moiva in Spagna e o l’ea asoteròu a Zena!
Saiâ o Congresso de Vienna e a coæ de Zena che i Savöia an senpre avuo, a sospende l’existensa de ’n stato sovrano ch’o mantegne inalteræ i diritti a ritornâ indipendente! Zena a l’ea ricca, e tanto: coscì pe giustificâ l’anescion fæta contra i diritti di pòpoli n’an contòu a föa che o governo o l’ea decadente, ch’o no ghi-â fava ciù a tiâ avanti: tutte vesce!
Zena a l’ea capitale e a Zena gh’ea de tutto, röba e travaggio. Dixe i libbri de stöia che quande a carestia a s’abateiva in scê canpagne, Zena a l’ea in graddo de dâ da mangiâ e da travagiâ a-i vilen che çercavan resciöo in çitæ. I Zeneixi, pò-u ben da Republica, s’ean scinn-a inventæ a deutta de stato pe-e figge pövie! Insomma quella a l’ea ’na Zena superba no solo pe òmmi e pe miage, ma anche perché a rispetava i atri e a se fava rispetâ.

Seguo che ancheu questa Zena che ò contòu in doe paròlle, che gh’ò inta testa, ma sorviatutto into cheu, se fa fadiga a atrovâla inte nòstre stradde, inti nòstri caroggi, inti quelle dixineuve çitadinn-e unie a Zena do 1926 (la Grande Genova) e che, manaman che o tenpo o passa, perdan a seu secolare identitæ. Se fa fadiga a pensâ d’ese a caza nòstra quande i zoeni no riescian a trovâ lòu, a fase ’na famiggia e fâ di figgi. Se fa fadiga a giâ pe-e stradde tròppo spesso sucide, con marciapê e astreghi pin de pertuxi, e vedde e biteghe inportanti de vei che ancheu særan. Se fa fadiga a ese zeneixi mentre Zena a se desfa perché i zeneixi che gh’an e palanghe (e ghe n’é pe coscì!) no investan ciù a Zena.
Ese inta Compagna veu dî no rasegnase a questo destin pe Zena e pe tutta a Liguria, veu dî savei ritrovâ o spirito di zeneixi de ’na vòtta e dase da fâ perché e cöse belle de Zena pòssan continoâ a existe co-a seguessa che, pe Zena, i brutti momenti son stæti de longo o ponzigion pe fâ megio into futuo.

Scignoria a tutti!

5 Commenti

  1. Marco scrive:

    Braviscimo Profesô!

  2. pep scrive:

    Bravo. Da catalano, sono e sarò sempre accanto ai liguri in questa vostra rivendicazione. Ma vorieiva anche azonze che se voemmo che a Liguria a l´agge orgogio di se (ma come se dixe “orgoglio” in zeneize?) , e ch´a l´agge torna o seu outogoverno, foscia bezeugna ascì avei de longo in cheu i eroi ch´en staeti faeti. Intendo dire che bisogna anche non dimenticare il modo in cui la Repubblica fu formata -sottoponendo altri liguri, come quelli di ponente-. Nella consapevolezza degli errori starà la forza della Liguria

    e a propoxito di “errori”, scusae i sgoaroìn…

  3. pep scrive:

    (non so se sto ripetendo messaggio; se è così, scuse)

    Bravo. Da catalano, sono e sarò sempre accanto ai liguri in questa vostra rivendicazione. Ma vorieiva anche azonze che se voemmo che a Liguria a l´agge orgogio di se (ma come se dixe “orgoglio” in zeneize?) , e ch´a l´agge torna o seu outogoverno, foscia bezeugna ascì avei de longo in cheu i eroi ch´en staeti faeti. Intendo dire che bisogna anche non dimenticare il modo in cui la Repubblica fu formata -sottoponendo altri liguri, come quelli di ponente-. Nella consapevolezza degli errori starà la forza della Liguria

    e a propoxito di “errori”, scusae i sgoaroìn…

  4. Enrico scrive:

    Ti
    i parli de marciapê che anche int’i paixi ciù retrogradi gh’àn e rampette pe montâ e chinâ con e careghette pe invalidi ma chi a Zena semmo peso che int’o terso mondo e i posteggi pe noiatri invalidi son de longo occopæ da chi no ghe n’à diritto e i vigili no fan un beln ma a televion no ne parlan mai e no fan mai un servissio donde van a parlâ con chi de dovej

  5. Paolino scrive:

    Câo Franco condividdo in pin! Specie l’urtima parte. Ma purtroppo l’é un pö tutta l’italia a anâ a ramengo… sensa pöi parlâ de l’invaxon che stemmo subendo! A-a televixon fan vedde serviçi de caze ocupæ abuxivamente, de penscionæ agredii e picchéi… Mi a veddo mâ pe-o futûo, spero de sbaliâme…

Lascia un commento

L’inportansa da grafia ofiçiâ

L’amigo Zòrzo Òdon o l’é stæto protagonista de ’n interesante esperimento de letua e conversaçion dov’o l’à provòu a mostrâ

Lescico e scintasci

Devo famene ’na raxon e pigiâ nòtta che tanti pensan che quande se parla do zeneize tutto va ben. In

A lengoa leteraia

A lengoa leteraia

Se ne sente parlâ e de spesso no s’acapisce cöse s’intende quande se dixe: lengoa leteraia. Ma cöse diascoa a

È corretto cambiare la grafia dell’autore che si cita?

Inte questo comento o Marco Rosci, dòppo avei lezuo quello che gh’é scrito chi: “No moiò tutto arrëo” cit. da

CATEGORIE

Link utili

Search

Archivio